Deba Xtreme Kirol Taldeak antolatzen duen Itxasmila zeharkaldia hirugarren amaitu zuen Erika Amundarain billabonatarrak asteburuan.
Mutriku eta Deba arteko hiru kilometroak 43:21eko denboran egin zituen. Bigarren postua gertu izan zuen, 26 segundora. Leire Ceciaga Lizarra azpeitiarrak eskuratu zuen aurretik.
Ioseba Mateos Mateos ibartarra, berriz, bederatzigarren sailkatu zen. 40:07ko denbora egin zuen.
Marea Urdinari babesa
Podiumean, Marea Urdinari babesa eman zioten igerilariek. Hain zuzen, asteburu honetan egingo dute Marea Urdina deitu dioten zeharkaldia, Autismoa eta bere errealitateak ezagutzera emateko helburuarekin. Gipuzkoako kosta osoa zeharkatuko dute, igerian, erreleboka.
Bi etapatan egingo dute zeharkaldia. Larunbatean, Mutrikuko Saturraran hondartzatik Oriora joango dira, 26 kilometroko bidea osatuz. Igandean, berriz, 36 kilometro egingo dituzte, Oriotik Hondarribiaraino.