Bi bikote dira: batetik, baserritar bikotea, tradiziozko herriko arropekin apainduak, eta bestetik, Pedro Yarza Villabonako Besamotza izenez ezagutzen den pilotaria eta Amasako Iturrigoxoko emakumea.
Irungo Garate anaien tailerra izan da konpartsako pertsonaiak egiteko ardura izan duena, Pepita esnezalea eta Xanti Udaltzaina buruhandiak egiteko ardura izan zuen enpresa berbera. 21.780 euroko aurrekontua izan dute lan horiek egiteko.
Erraldoi bakoitzak 30 kilo inguruko pisua du, eta 3,65 metroko altuera dute, 4 metro inguru martxan daudenean. Erraldoien eraikuntza erabat artisaua da, eta desmuntagarriak dira, garraioa errazteko. Xehetasun guztiak zaindu dituztela azaldu du udalak.
Aurtengo Santio festetan estreinatuko dituzte, baina aurrez, herritarrek ezagutzeko aukera izango dutela jakinarazi du udalak.