Joan den maiatzaren 15ean, Maite Izagirre alkateak, udal hitzarmenaren zirriborroa eman zion Amasamendiko abeltzainen elkarteko presidentea den Joxe Mari Ugartemendiari; akordio horretan azaltzen denez, elkarteak 2.500 euroko diru laguntza jasoko du udaletik, sasiak garbitzeko makina erosteko.
Osatuz Herrigintza programaren lehenengo fasean bildutako konpromisoa da eta bere momentuan, ezin izan zen gauzatu elkartearekin lotutako gai batzuengatik. Pasa den maiatzaren 28ko gobernu batzordearen akordioaren ondoren, ofizial egin da auzolaneko lanak sustatzeko laguntza ekonomikoa.
Pasabideko pintaketak
Osatuz Herrigintza programako bigarren faseak bere egitaraua garatzen jarraitzen du. Segurtasun eremuaren barruan, Txermin eta Arratzain lotzen dituen lurpeko pasabidea pintatu da, baina kasu honetan, udalaren esanetan, "emaitza ez da guztiz positiboa izan". Egokitzapen lanak amaitu eta egun gutxira, "izaera politiko eta beste mota batzuetako pintadak agertu dira berriro, horrek, gizabidearen aurkako gertaera hauekin amaitzeko oraindik ere, pausu asko falta direla erakusten du", esan dute udal gobernuko kideek.