Amasatik abiatu, Loatzoko gaina zapaldu, eta berriro ere irteerako lekura bueltatu behar izan dute korrika egitera animatu direnek. 10:30ean eman zaio hasiera mendi lasterketari, Uxo-Toki elkartearen aurretik. Guztira, 9.73 kilometroko ibilbidea osatu behar izan dute.
Julen Larruzea izan da lehena helmuga zeharkatzen; 0:43:42ko denbora behar izan du ibilbidea egiteko. Ondoren, Anartz Artola helmugaratu da, 0:44:2ko denboran, eta segituan zuen Iñaki Olano altzotarra, 0:44:35 behar izan du.
Nesketan, berriz, Aitziber Ibarbia zizurkildarra izan da garaile, 0:56:24ko denboran ibilbidea eginda. Pare bat minutu geroago iritsi dira hurrengo bi emakumeak: Maialen Gurrutxaga 0:58:42ko denboran helmugaratu da, eta hiru segundo geroago zeharkatu du meta Onintza Mitxelenak, 0:58:45ko denboran.
Podium horiez gain, herriko lehenak ere jaso du bere saria; Eñaut Galarraga 16 urteko amasarrak eskuratu du, 0:51:4ko denboran Loatzotik buelta eginda.