Tokiko Agenda 21 garapen jasangarri baten alde egiteko lan tresna eredu bat da. Eredu honek udaleko ingurumen arloa, ekonomia arloa eta arlo soziala barneratzen ditu, herritarren bizi kalitatea eta udal kudeaketaren hobetzea sustatuz.
Dagoeneko 10 urte pasatu dira Villabonako udalean garapen jasangarriaren alde lan egiten hasi zirenetik: 2007an Tokiko Agenda 21eko Plana osatu zuten eta geroztik, plan honen kudeaketa aktiboa egin dute.
2007ko Plana agortuta, iaz Amasa-Villabonako Tokiko Agenda 21 Plana berrikusteko prozesua abian jarri zuten, guztion artean udalerriko egungo behar nagusiei aurre egingo dion tokiko Agenda 21eko Plan berri bat definitu ahal izateko.
Lehenik eta behin udalerriko diagnostiko partekatua egiten hasi dira, non ikuspuntu teknikoaz gain herritarren ikuspuntua eta batez ere udalerriaren onura bilatzen dituzten pentsamendu eta hausnarketak jaso nahi dituzten.
Horregatik, martxoan egingo diren saioetan parte hartzera gonbidatzen dituzte herritarrak: "Guztion artean egungo egoeraren ikuspegi partekatua osatu eta etorkizunari begira Amasa-Villabona udalerri jasangarriagoa egiteko indarrak non jarri beharko genituzkeen elkarrekin adosteko", esan du udalak.
Bi bilera iragarri dituzte:
Martxoak 6, asteartea
18:30. Subijana etxea (Villabona).
Martxoak 7, asteazkena
18:30. Kultur etxea (Amasa).