Dantzari, txirula jotzaile eta kantaria. Ordena horretan garatu da artista gisa Jean Mixel Bedaxagar. 2015ean Belatxa (Elkar) diskoa atera zuen eta hori aurkezteko bira egiten ari da egunotan. Gaur Donostiako Lugaritz kultur etxean ariko da, bihar Amasako San Martin elizan eta igandean Mungiako Olalde aretoan.
Lan honetan, Mixel Etxekopar (ahotsa, xirula eta ttunttuna) eta Sacha Standen (arrabita, pianoa eta moldaketak) izan ditu lagun. Talde txiki baina eraginkor honekin iritsiko da, bihar, Amasara. Ekoitzi duen diskorik «mamitsuena» da 2015ean kaleratutakoa. «Inspiraziorik garbienak bildu nahi izan balitu bezala, oroimenik gustukoenak, doinurik maiteenak, sustraien erreferentziaz eta naturaren usainaz atonduriko lana osatu du».
Bihar, larunbata, 19:30etik aurrera izango da emanaldia Amasako San Martin elizan eta ez da ezer ordaindu beharko kontzertuaz gozatzeko. Amasa-Villabonako Udalak urtaro bakoitzeko emanaldi bat antolatu nahi izaten du Amasan eta iraila bukaeran, esate baterako, Xabier Lizaso piano jotzaileak eta Andoni Egaña bertsolariak Bi arreba ikuskizuna eskaini zuten elizan bertan.
Bihar, 19:30etik aurrera ariko da Zuberoako kantari eta musikaria, Mixel Etxekopar eta Sacha Standenekin batera.
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
EGIN ATARIKIDE!