Euria egiten duenean umeek babestuta egon daitezen beharrezkotzat jo du talde sozialistak parkea estaltzea, "herrian erabilienetako bat baita".
PSE-EEko udal taldearen bozeramalearen esanetan, "aurrera eramanez gero, herrian izango genukeen lehen parke estalia izango litzateke". Arijak azaldu duenez, "helburua haurrentzako parkeak hobetzea da, etxeko txikienek espazio hauetaz gozatu dezaten urte osoan zehar eta euriagatik edo eguraldiaren zakartasunagatik jolasik egin gabe gera ez daitezen".
EH Bilduren erantzuna
Amasa-Villabonako udal taldeak bere webgunean erantzun dio PSE-EEk ohar bidez esandakoari. "Guk ondo gogoratzen dugu 2016an proiektu hau egiteko aurkeztu genuen aurrekontu-zuzenketaren aurka bozkatu zuela Arijak. Urteak daramatzagu Larreako parkea estali dadin eskatzen, ongi etorri Arija!", idatzi zuen koalizio abertzaleak atzo sare sozialetan.
Herritarrek emandako iritzia aintzakotzat hartu eta Larrea parkea estaltzea erabaki zuen 2015eko apirilean Amasa-Villabonako Udalak; udal gobernuan aldaketa eman eta asmoa bertan behera utzi zuen talde berriak, orduko alkate Iban Agirrek osoko bilkuran azaldu zuenez, "guretzat ere proiektu interesgarria da, baina inbertsio handia suposatzen du. Aurten obra hori merkeago egin daitekeen aztertuko dugu". Aurrekontuari osoko zuzenketa egin zion EH Bilduk eta besteak beste, Larrea parkea estali ahal izateko 142.103 euro bideratzea proposatuz. EAJk eta PSE-EEk zuzenketaren aurka bozkatu zuten. Harrezkero, geldirik da proiektua.