Joan den urrian udalak onartutako inbertsioen planari jarraituz, Olaederra kiroldegiko gimnasioan kirola praktikatzeko aparatu berriak ipintzeko lanak amaitu dituzte duela egun batzuk: 2 bizikleta estatiko, spinning egiteko 4 bizikleta, step-erako 2 aparatu eta oinetarako bi pisu-makina jarri dira, hain zuzen.
Elementu berri horiek martxan dauden jadanik, eta kiroldegiko arduradunekin nahiz erabiltzaileekin hitz egin eta beharrak aztertu ondoren erosi dira, 18.000 euroko gastua suposatu dutelarik. Hala ere, eta materiala Kirolzer enpresa kudeatzailearen bitartez erosi direnez, aparatuen prezioan %40a aurreztea lortu da.
Udaletik azpimarratu dute Olaederra kiroldegiari dagokionean jarraituko den lan-ildoak bi ardatz nagusi izango dituela: "alde batetik, etengabeko hobekuntza prozesu batean oinarrituz zerbitzuen kalitatea mantentzea, eta bestetik, Kirolzer S.A. enpresarekin erosketa konpartituko kudeaketa indartu. Ibon Ariznabarreta (EAJ) kiroletako zinegotziaren esanetan, "horrela kalitatea hobetzea lortuko dugu herriarentzako kostu gutxiagorekin. 2016an inbertsio garrantzitsua egin genuen eta orain gure konpromisoa indartzen dugu".
Bestelako hobekuntzak
Azken aste hauetan Kirolzerrek kiroldegira sartzeko txartelak berritu ditu eta gainera, segurtasun baldintzak hobetzeko eta istripuak ekiditeko, bi neurri hartu dira: lehenik eta behin, eta udalaren aurrekontuaren kargura, larrialdietarako ateak aldatu dira; bigarrenik, adingabeek nahitaez bazkide txartela aurkeztu beharko dute gimnasiora sartzeko.