"Frantziako Gobernuak euskal presoei aplikatzen dizkien salbuespeneko neurriak bertan behera utz ditzala eskatzeko" deitu dute manifestazioa Bakegileek, eta Sare mugimendu herritarraren babesa ere badu.
Estanis Iriarte antolatzaileetako batek garrantzitsutzat jo du ahalik eta jende gehien joatea: "Aiztondo bailaratik autobus bat betetzeko erronka jarri dugu: ea lortzen dugun!", azaldu du. Autobusean izena emateko zerrendak jarri dituzte dagoeneko Villabonako Iratzar tabernan; ondorengo egunetan Amasa kafetegian, Errekan eta Iru-Aldetan ere jarriko dituzte.
Iriartek azaldu duenez, abenduaren 9ra bitarte beste hainbat ekitaldi ere egingo dituzte deialdia zabaltzeko; hasteko, azaroaren 16an, osteguna, mobilizazioaren aurkezpena egingo dute 20:30ean pleno aretoan.
