Igande honetan, irailaren 3an, hasiko da Enrique Abril Errebote Txapelketa. Aurten, Euskal Herriko lau talde lehiatuko dira: Behar Zana (Villabona), Txost (Oiartzun), Zubieta (Zubieta) eta Lapurdiko Luzean (Donibane Lohizune).
Lehenik, itzuli bateko ligaxka jokatuko dute; denek denen aurka jokatu beharko dute eta irailaren 3tik 24ra jokatuko dituzte partidak. Villabonako, Oiartzungo eta Zubietako plazetan jokatuko dituzte. Hain zuzen, Villabonan jokatuko da lehen jardunaldia, datorren igandean, Behar Zana eta Luzean elkarteen artean, 11:30ean.
Bigarren eta hirugarren postuan sailkatzen diren taldeek jokatuko dute finalerdia, urriaren 1ean. Partida hori irabazten duenak jokatuko du finala lehenengo fasean aurrena sailkatzen denaren aurka. Oiartzungo plazan jokatuko da urriaren 8an –eguraldiak txapelketaren datak aldatzen ez baditu, betiere–.