Azken hamarkadan bizi izan den krisi ekonomikoak merkataritza sektorearen beherakada ekarri du Villabonako talde sozialistaren iritziz; ohitura aldaketak, komunikazioan eman diren hobekuntzak, mugikortasunak, on-line bidezko salmentaren gorakadak eta merkataritza zentro handiek eragin dute ahultzea. "Geldoa" izan arren, berpizte ekonomikoa antzematen den garaia egokia dela irizten diote sozialistek "ezinbestekotzat" jo duten azterketa egiteko.
Maria Luisa Arija, Villabonako PSE-EEko bozeramaleak ohar batean adierazi duenez, "merkatarien ekintzak dinamizatzeko politika aktiboak beharrezkoak dira, sektoreak duen gaitasun traktorea eta izaera estrategikoa garrantzitsuak baitira". Horregatik komertzio txiki eta ertaina babestea "udalaren lehentasunezko helburu izan behar du, Villabonaren garapen ekonomikorako ezinbestekoa delako. Merkataritzak ez dakar aberastasuna soilik, lan postuak ere sortzen ditu".