Udal ordezkari guztien izenean, udaletxe aurrean egin duten elkarretaratzearen ondoren hitz hauek egin dituzte Maite Izagirre EAJko alkateak eta Xabat Laborde EH Bilduko zinegotziak –osasun arazoak tarteko, Maria Luisa Arija sozialista ez da Villabonan egon–:
"Bakeak eta bizikidetzak, indarkeriaren bidegabekeria eta eragindako mina aitortzea, eta biktima guztien duintasuna onartzea eskatzen du, biktima orok merezi baitu egia, justizia eta erreparaziorako eskubidea.
Giza duintasunaren, pertsonaren eta horren ondoriozko giza eskubideen errespetua edozein kausa politikoren edota Estatu arrazoiaren gainetik eta aurretik dago.
Etorkizunean, ez da jarri behar ez kausa politikorik, ez estatu arrazoirik, bestelako uste osorik edo ziurtasunik, giza eskubideen, pertsonaren eta bizitzaren balioaren gainetik".