Atzo, txupinazoa bota aurretik nesken pala txapelketako finala jokatu zen. Leire Rojas eta Ane Maiza geratu ziren txapeldun eta Nekane Aizpun eta Olatz Ugartemendia txapeldunorde. Partidaren aurretik, Iñaki Etxabe amasarra tarteko zela pilota erakustaldia egin zuten herriko frontoian.
Ondoren bota zuten festen hasiera iragartzeko txupina. Martina sorgina jaitsi eta intxorra aldatuta, Jeronimo dultzainero taldeko kideek alaitu zuten giroa, buruhandiak bertan zirela.
Gaur, berriz, gazteek euren eguna dute. Goizeko seietan, bi taldeetan banatuta abiatu dira puska biltzera baserriz baserri. Eguerdian, Uxo-Tokin elkartuko dira bazkaltzeko eta arratsaldean egingo dituzte soka dantza eta aurreskua plazan. Gauean, Iturri-goxo jatetxean afalduko dute.
Bihar San Martin eguna da eta era berezian ospatuko dute Amasan. Igandera arte luzatuko dira jaiak. Egitarau osoa ikusgai duzue hemen.