Euskal selekzioaren elastikoa soinean, Hassan Ait Chaouk ozeanoz bestalde eskuratu du, akaso bere kirol ibilbideko lorpen handienetakoa izan litekeena: munduko Skyrace txapelketako zazpigarren jardunaldia irabazi du.
Joan den larunbatean, AEBetako The Rut-en, Montanan, 28 kilometroko ibilbidea osatu behar izan zuten parte-hartzaileek, 2.400 metroko gora-beherarekin. Billabonatarrak hiru ordu eta sei minutuan biribildu zuen lana, ezusteko galanta emanda.
Proba hasi bezain pronto aurrea hartu zuten faboritoek, baina Dakota Jones estatubatuarrak lortu zuen bere aldeko tartetxoa zabaltzea; lan erditan, Jones-ek hiru minutuko aldea zuen gainerako korrikalariekiko, eta bazirudien lasterketa ia erabakita zegoela. Atzetik, podiuma osatzeko bidean, Hassan Ait Chaou eta Jan Margarit lanean ari ziren; lasterketa irauli egin zen, ordea, bigarren zatian.
Hassan Ait Chaouk lehen postuan jartzea lortu zuen, Dakota Jones atzean utzita, eta Jan Margarit ere atzean geratu zen, Kiril Nikolov eta Michael Barlow-ren mesedetan. Horrela, helmugara bakarrik iritsi zen Hassan Ait Chaou, kronoa 03:06an geratuz, eta bigarren sailkatuari 8 minutuko aldea aterata. Skyrunner Worl Series txapelketan estreinakoz jantzi du txapela.
The Rut, 28 kilometro (Montana, AEB)
- Hassan Ait Chaou – 3h06’39”
- Kiril Nikolov – 3h14’35”
- Jan Margarit – 3h15’00”
- Michael Barlow – 3h15’11”
- Timmy Parr – 3h22’02”