Manu Murielen lagunek diotenez, Billabona FKE-ren eraldaketa bere eskutik etorri zen, 80 jokalari izatetik 200era pasatuz. Murielek bizitzan bi pasio zituen, familia eta futbola. Larunbatean, biak elkartuko dira berriro ere Arratzainen.
Futbol txapelketa 10:00etan hasiko da, sailkatze fasearekin. Hitzordu berezia, ordea, 12:00etan izango da. Billabona FKE taldeko kideek omenaldi xumea egingo diote Manu Murieli eta bere senideei. Arratsaldean futbolak hartuko die berriro ere lekukoa. Kanporaketak jokatuko dituzte taldeek, 19:00etan finalak jokatzeko.
Txapelketa jokatuko duten taldeen artean eskualdeko hainbat ordezkari egongo dira: Billabona bera, bi talderekin, Zizurkilgo Danena, Tolosa CF eta Alegiako Intxurre KKE. Horiez gain, Euskalduna, Vasconia, Añorga, Sesma, Usurbil, Lazkao eta Ostadar ikusteko aukera egongo da Arratzainen.