2015-2016 ikastaroan zehar Kontsumo Ekologikoa izan da ardatz nagusia. Haur Hezkuntzatik hasita DBHko azken mailara arte azterketa sakona egin dute beraien ingurua, ikastetxea eta udaleko kontsumo jarreren inguruan. Lan honetarako, beraiek dioten bezala “ez gara bakarrik ibili, irakasleek, eskolako beste langile eta gurasoek ere hartu dute parte”.
Lehendabizi eskola aztertu zuten: erosten diren material motak, paper eta energia kontsumoa… Ondoren, Amasa-Villabona herriaren egoera eta Tolosaldea eskualdeak eskaintzen dituen aukerak ikertu zituzten.
Ikasgaiak mailaka
Maila bakoitzean gai ezberdinak aztertu dituzte: Haur Hezkuntzako ikasleei dagokionez, elikagaien ibilbide desberdinak ezagutu eta beraien jostailuak egiten ikasi dute. Lehen Hezkuntzako lehen eta bigarren mailako ikasleek, etxean soberan dituzten jostailuekin zer egin eta herriko parkeak aztertu dituzte. Hirugarren eta laugarren mailako ikasleek, herriko denda mota desberdinak eta ingurunean duten eragina ikertu dute. Bosgarren eta seigarren mailakoek, erosketetan sortzen diren plastiko hondakinak aztertu dituzte.
Derrigorrezko Bigarren Hezkuntzako lehen eta bigarren mailakoek, zabor elektronikoaren kudeaketa txarraren ondorioak ezagutu dituzte. Eta azkenik, DBHko hirugarren eta laugarren mailakoi dagokionez, udalaren erosketak “berdeak” diren ala ez aztertu dituzte.
Barne antolaketa
Urtebete honetan lan asko atera dituzte aurrera, kontsumo ekologikoaren oinarriak sendotuz eta kontzientzia sortuz. Lehen Hezkuntzako lehenengo mailatik hasita, DBH 4. mailan dauden gela bakoitzean arduradun bat egon da gai hau kudeatzeko. Gelan landutako gaietatik ateratako ondorioak ikastetxe berdineko, eta ondoren besteetako arduradunekin partekatzea izan da lana eta erronka, azkenik udaletxean aurkezteko asmoz.