Txapela garrantzitsua lortu du pasa den larunbatean Villabonako Eneko Maiz pilotariak Iruñako Larrabide trinketean. Lurraldekako GRAVNI txapelketan, 22 urtez azpiko mailan, eskuz banaka nagusitasun osoz irabazi du Behar Zanako pilotariak.
Gipuzkoa ordezkatuz, txapelketa bikaina osatu du Maizek. Ligaxkako partida guztiak irabazita finalera zuzenean sailkatu zen Eneko. Errioxa, Bizkaia, Araba, Iparralde eta Nafarroakoei irabazi ondoren, finalean berriro ere nafar selekzioko pilotaria egokitu zitzaion.
Finalean jokatu zuen agian torneoko partida txarrena. Urduritasunak lotuta, galtzaile eta presaka 26-16 galtzen joan zen Vicent Bideondo pilotariaren aurka. Hortik aurrera ordea, Maizek bere maila erakutsi eta 26-27koa lortu zuen. Partidari buelta eman ondoren, aurkaria urduritu eta zuzenean 40ra joan zen Eneko.
Azken emaitza 40-33koa izan zen eta txapela Villabonara ekarri zuen Maizek. Zorionak Eneko!