Jendea eta garagardo ekoizleak dagoeneko zoriontzen ari dira antolatzaileei egindako lanagatik. "Hori da gure satisfakzioa", esan du Otegik. Billabonatarrak zein kanpotik etorritakoak ari dira Bearzana frontoira joaten, eta adin tarte ezberdinetakoak. "Azoka goizetik hastearekin hori nahi genuen lortu, denetariko jendea etortzea. Aniztasun handia dago", esan du Otegik.
Jendea "harrituta" dagoela dio Otegik: "Espero zutena baino kalitate handiagoa ikusten ari dira azokara etortzen direnak. Jendeak esaten digu garagardo denak onak daudela. Gu bagenekien Euskal Herrian kalitate handia dagoela artisau garagardoetan, eta hori nahi genuen bultzatu, bertako produktua eta bertako garagardogileak". Otegik gaineratu duenez, artisau garagardoek "beste pertsonalitate bat dute".
Beertoki azoka 23:00ak arte egongo da zabalik Bearzana frontoian, eta ondoren hiru kontzertu izango dira, hiru taberna ezberdinetan, giroarekin jarraitzeko. Guztira 17 artisau garagardogile etorri dira Villabonara euren produktuekin.