Amasa-Villabonako udal gobernuak konponbide osoa eman nahi die ohiko etxebizitza mantentzeko , kaudimen-gabezia agertzen duten pertsona eta familiei."Bat-bateko egoera ekonomiko baten ondorioz ohiko etxebizitza galtzeko arriskuan daudenean ezarriko da protokoloa, beti ere, etxebizitza hori jabetzan duten higiezin bakarra bada. Ez da ezarriko ageriko gehiegikeria edo zabarkeria ekonomiko kasuetan" ohartarazi du udal gobernuak.
Amasa-Villabonako Udalak osatu asmo duen araudiak prozesuak irauten duen bitartean etxebizitza beharrari irtenbidea emateko aukerak aztertuko ditu: "Bai finantza entitateekin hitz eginez familia bere etxean gera dadin, edota egin behar diren gestioak eginez, alokairu sozialeko etxebizitza publiko bitartez, posible den kasuetan". Laguntza ekonomikoak beharrezkoak balira, horiek kudeaketa ere aztertuko du protokoloak.
Udal gobernuak adierazi duenez, "etxegabetze kasuetan, ebaluazioa eta diagnostikoa, udaleko zerbitzu sozialek egingo dute eta haiek izango dute azken hitza".