Hausnarketa prozesua martxan jarri eta urtebetera, ondorioa atera du Amasa-Villabonko udalak: Amasamendiren erabilera arautzeko eta erabilera mota ezberdinen arteko elkarbizitza errazteko Antolaketa Plan bat idatzi behar da.
Dagoeneko martxan den lan talde tekniko bat eratu dute mendiaren Antolaketa Plana idazteko eta horrekin batera, "lan talde paraleloa" osatuko da, mendiaren erabiltzaile guztiek eta interesa agertzen duten herritarrek osatua. Erabiltzaile guztien ikuspegiak kontuan izango direla bermatzea izango da talde honen egitekoa eta plana idatziko duen lan talde teknikoari Amasamendi mendiaren inguruko informazioa ematea –bakoitzaren ohiturak, egiteko moduak eta ikuspegiak aintzat hartuta–. Erabiltzaile eta herritarrek osatutako taldeak Antolaketa Plana idazten den bitartean jarraipena egingo du eta hobekuntzak proposatuko ditu eta behin idatzita dagoenean bere gauzatzea ziurtatuko du.
Lan talde teknikoari aholkua emateko sortuko den taldearen lehen bilera asteartean egingo da, udaletxean, 19:30tik aurrera. Amasamendiren erabileran interesa duten herritarrak deitu dituzte bileran parte hartzera.