"Batzen gaituen bizimodu bat". Hori da Amasa, bertako bizilagunentzat. Gaur, ordea, Tolosatik banandu zeneko 400. urteurrenak batu ditu amasar gehienak, garaiko sinadura hura "berritu" eta ospatzeko.
Horretarako, emanaldi berezia prestatu dute, eta ia 100 pertsona batu dira elizan. Banaketa hori nola egin zen kontatu dute lehenik eta behin, eta ondoren, sinadura ekitaldiko antzerkia egin dute herritarrek. Tartean, Ioritz Galarragak sinadura hori egin zen pergaminoari dantzatu dio.
Eresargi abesbatzak ere ez du zitara hutsik egin, eta beren hainbat kantuz gozatzeko aukera izan da. Euskal Herriko Dantza Txapelketako garaile izan diren Lierni Kamio eta Iker Sanzek fandango eta arin-arinak dantzatu dituzte gero, eta amaitzeko, guztiek batera, bertso batzuk abestu dituzte. Honelaxe zioten bertsoek:
Doinua: Mendian gora haritza
Nahiz eta urteak pasa
herri bizi baten traza
hartu du eta gure artean
bada esperantza.
Iturri bueltako plaza,
herri zahar baten arnasa,
batzen gaituen bizimodu bat,
hori da Amasa
Inork izan balu duda
historia eredu da
aspaldi bizi izan ginela
gu herri modura
aspaldiko sinadura
bihurtu dadin ohitura
aurten berritu nahiko genuke
sinadura hura
Nahiz pasatu 400 urte
billabonatarren truke
“auzo” moduko deiturak sarri
aipatzen dituzte
nahiz ta faltan izan uste
bi-hiru lege ilustre
oraindik herri gera, ta hala
ikusten gaituzte
Tolosako erresuma
alboratuta zer suma
askatasunez eraikia da
gure erantzuna
oilasko gorrien luma
festen berezitasuna
inork ezin du ukatu gure
herri nortasuna
Emanaldi bereziaren ondoren festak kanpoaldean jarraitu du. Kanpai errepika izan da elizatik irten bezain laster. Herri argazkia atera, eta hamaiketako eder batez gozatu ahal izan dute. Bertan egin dute topa 400 urte hauengatik.