Azken sei urteetan bezala, Remi Gogoan ekimeneko kideek alkate ordea zena omentzeko ekitaldia egin dute bere monolitoaren ondoan. Aurten ere billabonatarrek ekitaldia babestu dute eta asko izan dira bertaratu direnak.
Remi Gogoan ekimeneko kideek esan dute orain sei urte gertatutakoa ahazterik ez dutela nahi eta horretan jarraituko dutela "tinko".
"Izan ere, askotan ari gara entzuten biktima guztiek eskubide berdinak dituztela. Guk ere hala pentsatzen dugu. Baina ez dugu hitz hutsak izatea nahi. Bada hitzetatik ekintzetara pasatzeko garaia. Bada Remiri zor zaion aitortza egiteko garaia" esan dute. Horiek horrela, "egia, justizia, errekonozimendua eta erreparazioa oinarri dituen aitortza" eskatu dute, "Remi ez zelako bihotzekoak jota berez hil". "Guztiok dakigu egun hartan festagunean nolako presio poliziala eta mediatikoa bizi izan zen. Presio hark kendu zigun Remi", gaineratu dute.
Era berean, gertatukoaren inguruko erantzuleek ardurak bere gain hartzea exijitu dute, "baina ez mendeku goseagatik. Justizia goseagatik baizik".
Omenaldia egitarautik kanpo
Gaurko omenaldia jai egitarautik kanpo utzi izana ere salatu dute. "EAJko alkateak ekitaldi hau jai egitarau ofizialetik kentzea erabaki zuen, festa batzordearen iritzia kontuan hartu gabe, eta aldebakarrez". Remi Gogoan ekimeneko kideekin oraindik ez dela harremanetan jarri esan dute, eta neurri hori hartu izana ulergaitza zaiela esan dute. "Zauriak ixteko bidean traba baino ez dela pentsatzen dugu".
Familiak duela egun batzuk Remi bortizkeria politikoaren biktima izan zela aitortzeko udalean egindako eskaerarekin bat egin du ere ekimenak. "Egunotan ez gaudela bakarrik ikusi dugu. Hasiera hasieratik herritarren babesa, bultzada eta animoa sentitu ditugu. Horren adibide Santio egunean herriko elkarte eta talde eragileetako kideek Remiri egin zioten lore eskaintza", gaineratu dute.
Ekitaldian lau dantzarik ere saio txiki bat eskaini diote Remiri eta herri sahararrak bidalitako gutun bat irakurri dute. Gutunean Remiren senitartekoei babesa azaldu diete eta justizia eskatu dute. Bertsolariak ere izan dira ekitaldian.
Bukatzeko Remiren anaiak hitz batzuk egin ditu jasotako babesa eskertuz eta justizia eskatuz.