Udaletxetik atera eta Errebote plaza pasata Santio Lasterketan parte hartzen ari zirenekin egin dute topo EAJko eta PSE-EEKo hautetsiek. Musikariak aurretik zituztela hautetsiek Jesusen Bihotza elizara joan dira Berdura plaza pasa eta Kale Nagusitik barrena. Errepideko bide batetik desfilea eta bestetik krosean parte hartzen zeudenak, hori zen panorama, eta bazterretan krosa ikustera gerturatutako herritarrak, harrituta.
Elizara iritsi eta mezetara sartu dira hautetsiak. Ordu bete inguru iraun du elizkizunak, eta handik aterata Santiago Egoitzara joan dira, berriz ere musikariak aurretik zituztela. Han zeuden jada EH Bilduko hautetsiak. Egoiliarrekin hitz egiten aritu dira guztiak, eta dantza ere egin dute denen aurrean, bertakoen gozamenerako.