Etxeratek euskal presoen senide eta lagunen bisita eskubideak "urratuak" izan direla salatu du. Izan ere, Villabonako Oskar Zelarain eta Hernaniko Pedro Cano presoen hiru lagunek ezin izan zuten hitzartuta zuten bisita egin. Autoan zihoaztela matxura izan zuten Calamochan (Teruel) eta ondorioz, ordu erdi beranduago iritsi ziren kartzelara, eta funtzionarioek sarrera galarazi zieten. Bi presoak Castello I kartzelan daude.
Era berean, bisita ukatzearekin batera, haientzako batentzat zuten paketea sartzea ere ukatu zieten. Etxeratek esan du "euskal preso politikoen senide eta lagun bezala gure eskubideen ukapena dakarren erdeinu honekin nekatuak" daudela. "Ez dugu etsiko gure eskubideak onartuak izen arte, gaur egun, horrelako adibideek erakusten duten bezala, ez baitaude", gaineratu dute.