Lain taldea 2008an eratu zuten Amasa-Villabonan. Orain arte, pop eta rock oinarriez osaturiko doinu melodikoak ziren taldearen ezaugarri nagusiena. Bada, aurkeztu berri duten diskoa honekin hori puskatzera datoz: rock-etik gehiago du 'Tximeletak' disko berriak, doinu biziago, gogorrago eta abesti kementsuago batzuekin.
Hamaika kantuk osatzen dute diskoa, eta "metamorfosia" gertatu bada ere, oinarrizko ezaugarri batzuk mantendu dituzte. Adibidez, Leire Berasaluzek eta Kristina Aranzabek abestuz jarraituko dute. "Badira trantsiziozko kantuak. Dena ez da berria" adierazi dute.
Martxoa eta apirila bitartean grabatu dute 'Tximeletak', Zestoako Gaztain estudioan, Eñaut Gaztañagarekin. Diskoan, gainera, aparteko lagunen parte hartzea izan dute, hala nola, Natalia Garmendia, Jon Arruebarrena, Felipe Murillo, Nerea Lasaga eta Xabier B. Leturiarena.
Aurkezpen publikoa, berriz, maiatzaren 9an egingo dute Tolosako Bonberenean, 22:30ean.