Villabona.dok zikloaren hirugarren edizioa da aurtengoa. "Amasa-Villabonako Udaleko Kultura sailak 2013an Gurea zinema aretoaren biziraupena ziurtatu, erakargarritasuna bermatu eta edukiz betetako programazioa aurrera eramateko konpromisoa hartu zuen", adierazi du Nora Urbizu kultura zinegotziak. Horretarako proiektore digitala eta pantaila berria erosi zituzten antzokirako, legealdiko inbertsio nagusienetakoa izan dena.
Proiektore eta pantaila berriak, berekin batera beste hainbat ekimen berri ekarri ditu, tartean dokumental zikloa. Bi edizio egin dituzte orain arte eta udal ordezkariek aitortzen dute herritarrek gustora hartzen dutela ekimena, ilusioz. "Badakigu nahiko minoritarioa dela genero hau, baina ikusten dugu eboluzioa eta geroz eta jende gehiago gerturatzen da. Mimo guztia jartzen dugu dokumentalak aukeratzeko garaian eta gai ezberdinak islatzen saiatzen gara".
Erakutsiko diren dokumental gehienak 2014an egindakoak dira. Aurtengo berrikuntza Five days to dance dokumentala izango da: 12 eta 18 urte arteko gazteek doan ikusi ahal izango dute. Urbizuren esanetan, "oso hunkigarria da dokumentala eta gure ustez gazteentzako onuragarriak diren baloreak islatzen ditu".
Astelehen eta asteazken eskainiko dira emanaldiak, iluntzeko 20:30etan eta sarrerak hiru euro balioko ditu. Saio guzietarako bonoa 20 eurotan jarriko dute salgai. Maiatzaren 6tik ekainaren 8ra eskainiko dira dokumentalak.
Guztira 11 dokumental eskainiko dira 10 emanalditan. Egitarau osoa duzue hemen:
Maiatzak 6, asteazkena: Euskara, ospela eta egutera eta Badira bagara
Maiatzak 11, astelehena: Citizenfour
Maiatzak 13, asteazkena: Art and craft
Maiatzak 18, astelehena: Los malos sueños de René Petit
Maiatzak 20, asteazkena: Prohibido recordar
Maiatzak 25, astelehena: Izan pirata
Maiatzak 27, astelehena: Five days to dance
Ekainak 1, astelehena: Coria y el mar
Ekainak 3, asteazkena: A 20 pasos de la fama
Ekainak 8, astelehena: Remine, el último movimiento obrero