Herriko komertzioekiko fideltasuna eta konpromisoa ezinbestekoa dute merkatariek. Oria elkartean biltzen diren saltokien izenean hitz egin du Aitziber Cenzanok: «gure bizilagunak, gure bezeroak dira gure arnasa. Haiek gabe ezingo ginateke bizi eta horregatik azpimarratu nahi dugu zeinen garrantzitsua den erosketak herrian egitea».
Aurreko urteetako dinamika jarraituko dute aurten ere. Egindako erosketengatik txarteltxo bat emango diete bezeroei. Txartelean izena eta abizena eta telefono zenbakia idaztea eskatzen diete. «Oso garrantzitsua da eskatzen ditugun datu hauek ondo betetzea, gero irabazlearekin harremanetan jarri ahal izateko». Datuak bete ondoren, txarteltxoak saltoki bakoitzean prest izango diren kutxatxoetan sartu beharko dira.
Kanpaina atzotik dago martxan eta maiatzaren 30era arte iraungo du. Ordan bilduko dituzte txartel guztiak. Opariaren zozketa berriz, ekainaren 2an egin asmo dute. «Berdura plazan egingo dugu, eguerdiko 13:30etan. Han bertatik irabazleari deituko diogu eta zuzenean saituko gara berekin harremanetan jartzen».
Kanpaina honen arauak saltoki bazkidetu guztietan edukiko dituzte eskuragai bezeroek. Xehetasun guztiak irakurri ahal izango dituzte bertan.
Honenbestez, Villabonako Oria Merkatarien elkartekoek deia egin diete bezeroei: «orain zuei tokatzen zaizue erosketak gure saltokietan egitea eta Parisera joateko bidai bat irabaz dezakezue, beraz animatu».