Zazpi taldek hartuko dute parte Enrike Abril Txapelketan:Zubieta, Zaharrer Segi, Endaiarrak, Luzaz Gazte, Txoste, Kapito Harri eta Behar Zana. Aurtengo parte hartzaile guztietatik Luzaz Gazte taldeak irabazi ditu txapelketako edizio gehien, 14 txapel jantzi baitituzte baigorriarrek. Behar Zanak lau aldiz lortu du garaipena txapelketan eta beste sei ediziotan izan da txapeldunorde.
Bi fase izango ditu txapelketak. Lehenengoan bi multzotan banatuko dira talde parte hartzaileak partida banako ligaxkatan. Honen ondoren txapelketaren bigarren faseari ekingo diote. Lehenengo faseko multzo bakoitzeko ligaxkan aurreneko bi postuetan sailkatutako taldeak gurutzatuko dira final erdietan. Finala, urriaren 5ean aurreikusi dute antolatzaileek.
Argazki lehiaketa ere martxan
Aurten ere, Enrike Abril pilota txapelketaren aitzakiarekin argazki lehiaketa antolatu dute Behar Zana elkartekoek. Hirugarren edizioa izango du errebote jokoaren inguruko argazki txapelketa honek eta 16 urtetik gorakoek parte hartu ahal izango dute. Bi pertsonentzako otordu bat irabaziko du lehenengo saria lortzen duen argazkilariak.
III. Argazki Lehiaketa
ERREBOTE JOKOA
- Epea. Irailaren 7tik urriaren 5era.
- Beharrezko datuak. Argazkilariaren NAN zenbakia, izen-abizenak eta kontakturako telefono zenbakia.
- Txapelketaren oinarriak. Posta elektroniko bidez bidaliko dira.
- Parte hartu ahal izateko. Mezua bidali beharzana@gmail.com helbidera.
- Sariak. Irabazlearentzat, bi pertsonentzako afaria edo bazkaria Benta Aldea Bodegoian. Bigarren sailkatuarentzat, hainbat produkturekin osatutako lote bat. Partaide guztientzat, opari bat egongo da.