Gizarte Politikako diputatu den Ander Rodrigez eta Amasa-Villabonako alkate den Galder Azkue Santiago adinekoen egoitzan izan dira gaur bertan egoitzan egindako berritze lanak ezagutzeko. Amasa-Villabonako Udalak Gipuzkoako Foru Aldundiaren laguntzaz Santiago egoitzan egindako berritze lanek "zerbitzua hobetzea eta zabaltzea" izan dute helburu.
Lanak 2009an hasi ziren eta aurten amaitu dira, eta hiru fase ezberdin izan dituzte. Guztira 1.500.000 euro inbertitu dituzte egoitza berritzen, eta kopuru horren %75 Foru Aldundiak ordaindu du eta %25 Amasa-Villabonako udalak.
Azken hamalau hilabeteetan, obren azken fasea egin da, egoitza araudia egokitze aldera. Batez ere gelak eta bainugelak egokitzen egin dute lan; eta adinekoen "irigarritasuna bermatzea" izan dute helburu. Lan hauei esker 7 plaza gehitu dituzte egoitzan, hortaz, guztira 39 pertsonei emango zaie zerbitzua egoitzan. Egun 32 dira beteta dauden plazak. Gainera, lau plaza ere eskaintzen ditu egoitzak eguneko egonaldietarako.
Fortunata Iturbe eta Juliana Etxezarreta egoilarrak ere izan dira Azkue eta Rodrigezekin eta egindako aldaketekin "gustura" eta "oso kontentu" daudela azaldu dute.
Kudeaketa Aldundiaren esku
2015etik aurrera Gipuzkoako Foru Aldundiak bere gain hartuko du Santiago egoitzaren kudeaketa eta Rodrigezek azaldu du bi konpromiso hartu dituztela: "zaintzen kalitatea mantentzea" eta "langileen baldintzak bermatzea"