Paloma Iglesias fiskalak Auzitegi Gorenean Manex Castro preso billabonatarraren 44 urteko espetxe zigor eskaera berrestea eskatu du. Zigorra Entzutegi Nazionalak jarri zion 2008an Inazio Uria enpresaria hiltzea egotzia. Fiskalak Terrorismoaren Biktimen Elkarteak (AVT) eskatutako gauza bera eskatu du gaurko bista publikoan.
Castroren abokatuak gaztea ETAko kide zela eta Uria hil zuen taldeak egindako beste ekintza batzuetan parte hartu izana onartu du. Abokatuak, hala ere, Uriaren hilketan parte hartu izana frogatzen duen probarik ez dagoela esan du eta proba bakarra taldeak erabilitako telefonoan gerora egindako beste ekintza batzuetan bere DNA aurkitu izana dela gogoratu du. "Ez zuen ekintza horren berri", esan du.