Altzon etxebizitzak eraikitzeko urbanizatze-lanak egiten ari dira herriaren sarreretako eremu batean. Artzamendi enpresa ari da lanak gauzatzen eta, aurreikuspenen arabera, urtea amaitzerako bukatuko dute. Lehen obra hori bukatu ondoren hasiko dira etxebizitzak eraikitzen.
Eremu hori udalaren jabetzakoa da, eta Xabier Olano alkateak azaldu du lehen fase honetan, guztira, hamabi etxebizitza tasatu egingo dituztela, bi eraikinetan banatuta. Herriko gazteekin etxebizitzaren afera lantzen aritu da udala eta, egoera aztertu ondoren, deialdia zabaldu zuten interesa izan zezakeenak izena emateko. Aipatu bezala, urbanizatzeko lanak urtea amaitu aurretik bukatzea espero dute, eta datorren urtean hasiko dira eraikitzen.