Pilar Zubiarrain hil zen astelehenean, 58 urte zituela, bihotzekoak jota. Altzoko alkate izan zen 2003 eta 2007 urteen artean EAJ alderdiarekin –ezker abertzalearen ilegalizazioa eman zen legegintzaldi horretan–, eta Altzoko Handia eta Altzoko Imazen pagoa –lursailaren jabea zen– ezagutarazteko lan asko egin zuen.
Abokatua zen eta hainbat mehatxu eta eraso salatu zituen; 1999an Altzoko familiako baserria erre zioten, pintaketak egin zizkioten eta bere ibilgailuari su eman zioten, besteak beste. Jasandako jazarpena dela eta 2009an Batzar Nagusietan omenaldia jaso zuen.
Enba sindikatuak eta Maria Eugenia Arrizabalaga EAJren GBBko presidenteak euren doluminak azaldu dituzte sare sozialen bidez. Enbak esan du baserritarren eta nekazarien defendatzaile izan zela eta baita lehen sektorearen aldeko legeen bultzatzailea ere. Maria Eugenia Arrizabalagak, bere aldetik, eskerrak eman dizkio herrigintzarekin izandako konpromisoagatik. Gehitu du, 90eko hamarkadan izandako errepresioari erreferentzia eginez, duela gutxi esan ziola zorionez gauzak asko aldatu direla.