Urtero legez, aurten ere Euskal Herriko Sega Ligaxka jokatuko da Almitza Sega Elkarteak antolatuta. Ohiko moduan hiru jardunalditako ligaxka izango da, eta honako egunetan jokatuko da:
- 1. jardunaldia: maiatzaren 6an, larunbata, Etxalekun.
- 2. jardunaldia: maiatzaren 21ean, igandea, Hernanin.
- 3. jardunaldia: ekainaren 3an, larunbata, Altzon.
Hiru jardunaldietako ligaxkako sailkapenaren arabera erabakiko dira aurten Eslovenian jokatuko den Europako Sega txapelketako euskal ordezkariak.
Belar-saila ahalik eta azkarren eta txukunen ebaki beharko dute segalariek; txukuntasuna denbora-zigorrez epaitzen da, mozteko behar izan den denborari zigor-denbora batzen zaio. Emakumezkoek 35 metro karratuko saila ebakiko dute (5 metro x 7 metro); gizonezkoek, berriz, 100 metro karratukoa (10 metro x 10 metro). Gazte eta haurren sailen neurriak izena ematen duten gazteen arabera zehaztuko dituzte.
Jada irekita dago ligaxkarako izen-ematea eta apirilaren 30a izango da azken eguna. Parte hartu nahi duenak bi aukera ditu: 677 095 864 telefono zenbakira deitu edo whatsapp-a bidali, edo almitzasega@gmail.com helbide elektronikora mezua idatzi. Izena emateko ondorengo datuak jasoko dituzte: Izen-abizenak eta herria. Haurren kasuan adina ere zehaztu behar da.