Asisko Urmeneta Otsoa irudigile eta komunikatzaileak Euskal Herriko historian sakontzeko saioak eskainiko ditu Altzon. Udalak eta Kultura Batzordeak antolatu dute ikastaroa, iazko ikasturtean hasitako bideari jarraituz, eta aurtengo ikastaroaren helburua da Euskal Herriko historian sakontzea, eta batez ere, iazko ikastaroan landu gabe geratu ziren gertaera eta eremuetara iristea.
Ikastaroak lau saio barnebiltzen ditu eta izena urtarrilaren 26a bitarte eman daiteke kultura@altzo.eus helbidera idatziz, edo udaletxera gerturatuz. 20 euro ordaindu beharko da.
Saioak urtarrilaren 28an, otsailaren 25ean, eta martxoaren 11n eta 25ean izango dira, 10:00tatik 12:00etara, Batzarremuñon. Argitu dute saioetan atsedenaldi motz bat egingo dutela.
Lehen saioan 1513 eta 1614 urteen artean Euskal Herrian eman zen sorgin ehiza izango dute hizpide. Bigarrengoan 1789ko Frantziako Iraultzak eta Konbentzioaren Gerlak Euskal Herrian izandako eragina. Hirugarrengoan 1833 eta 1876 arteko Karlistadak eta izan zituzten ondorioak, eta laugarrengoan Karlismotik euskal abertzaletasunerako bidea.