Irakurle feministek Altzon izan dute elkargunea

Eneritz Maiz Etxarri 2021ko eka. 12a, 19:59

Tolosaldeko Irakurketa Feminista Taldeen I. Topaketa egin dute gaur Altzon. Goizean irakurketa feministak trukatu dituzte Kattalin Minerrek gidatuta, eta bazkalostean, bertso saio literarioa izan dute Alberdi, Amuriza eta Labaka bertsolariekin.

Altzoko eragile ezberdinek antolatuta, Tolosaldeko Irakurketa Feminista Taldeen I. Topaketa egin dute gaur egunean zehar.

Irakurle taldeei eta oro har irakurzale feministei deia egin zieten gaurko topaketarako. Goizean, Kattalin Minerrek dinamizatuta, lehenik eta behin, bertaratu direnek elkar ezagutzeko aukera izan dute, eta galderaren bat edo beste erantzun eta gero, irakurritako liburuetako hausnarketak konpartitzeko tartea izan dute. Goiza konturatzerako pasa zaie, eta nahi izan dutenek elkarrekin bazkaltzeko aprobetxatu dute.

Emakume batek idatzitako liburua eraman behar izan dute izena emana zutenek, eta horrela  liburuen trukea egin ahal izan dute.

Arratsaldean, belarriak prest izan dituzte bertso saio literarioaz gozatzeko, barre egiteko eta hausnartzeko. Uxue Alberdi, Miren Amuriza eta Ane Labaka bertsolari eta idazleek egin dute saioa, eta literaturari lotutako gaiak jartzeko ardura Minerrena izan da.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!