Zaldibar gogoratuz eta Larreko Mahaiaren U30 Aldaketaldiarekin bat eginez, Altzoko Udala ekimenera batu da, eta Altzo Azpin zuhaitz landaketa burutu dute gaur goizean. Euria eginagatik, eta lokatza egonagatik ere aurrera egitea erabaki dute altzotarrek. 24 pertsona elkartu dira guztira.
Bertako haritzak, gorostiak, elorri zuriak eta beltzak, sagar minak, makatzak eta erramuak landatu dituzte. Guztira 60 landare. Haritzalde Naturzaleen Elkartea elkarteak Altzoko Udalaren laguntza izan du. Aldez aurretik, baso zatia udalak garbituta jarria zuen gaur landaketa egin ahal izateko. Elkarlanean egin dute eta Lurgaia Fundazioaren laguntza ere izan dute gaurko landaketa egiteko. "Umeek lan bikaina egin dute", adierazi dute elkarteko kideek.
Atzo ere Altzon izan ziren Haritzalde elkartekoak, eta hitzaldia eskaini zieten herriko haurrei zuhaitzek eta basoek duten garrantzia azaltzeko, eta biodibertsitatearen kontserbazioari begira. Ondoren, Altzoko Handiaren tamainako gorosti eder bat landatu zuten, herrian bertan, frontoiaren ondoan. "Planeta hemen hasten delako, ekin egin behar zaio", diote ozen elkartetik. "Aldatu behar da sistema, ez planeta eta ez klima", diote.
Gaurko lanaren ostean jarraipena egingo diete zuhaitzei eta baita inguruari, eta besteak beste, zuhaitzei babesgailuak jarriko dizkiete.
Amaitzeko, omenaldi txiki bat egin nahi izan diete, gaur urtebete, Zaldibarko zabortegian hil ziren bi langileei. Joakin Beltran eta Alberto Sololuze gogoan izan dituzte, eta lanak bukatuta minutu bateko isilunea egin dute basoan bertan.