Eusko Jaurlaritzak diru laguntzak ematen ditu, eta hori baliatu dute frontoiko horma margotzeko. Altzoko herritarrek aukeratu dute bai horma, eta baita zer irudikatu ere.
Udaz geroztik eginiko hiru bileretan erabaki zuten zer nolako Altzo nahi duten, eta hori irudikatu nahi izan dute horman: feminista, aiton-amonak kontuan hartzen dituena, ingurugiroa zaintzen duena, askea, alaia, musika eta dantza falta ez dituena, bizia, anitza, integratzailea, euskalduna... Txitxi Orbegozoz gain, Eider Epelde herritarra ere aritu da lanean herritarren ideia eta irudiekin bozetoa osatuz.
Ikertze Kultur elkartearekin egin dute, Orbegozo bertako kidea delako, eta Ikertzeko teknikaria izan da herritarrekin eginiko bilera horiek gidatu dituena.
Urriaren 16tik 18ra bitartean margotu zuten herritarrek, artisten gidaritzapean. 40 bat herritarrek parte hartu zuten, margotzen edota bileretan parte hartuz. Herritarrek pintatu dute, eta pintura klase sakonak jaso dituztela aitortu dute udaletik, eta asko ikasi dutela.
