Altzoko Udalak Altzo Muñon egingo diren sei etxebizitza tasatuetan interesa dutenei izena emateko epea zabaldu die. Dagoeneko martxan jarria dute bigarren promozioa, eta obrak udan hastea aurreikusten dute.
Udalak sei etxebizitza tasaturen adjudikazioa egin dezan nahitaezkoa da izena ematea. Martxoaren 18an, 14:00etan, bukatuko da apuntatzeko epea. Altzotarrez gain, edozein herritarrek eman dezake izena. Izena ematerakoan ondorengo agiriak aurkeztu beharko dira: eskaera egin beharko da; zinpeko aitorpena onartu beharko da ordenantza ezagutzen dela, ontzat ematen dela, eta bertako baldintzak betetzen direla eta beteko direla aitortuz; eta errolda historikoa eta 2018. urteko errenta aitorpena aurkeztu beharko dira.
LEHENTASUNA, ALTZOTARREK
Altzo Muñon egin zen azken etxebizitzaren antzeko ezaugarriak izango ditu orain eraikiko denak, eta Altzoko udal etxebizitza tasatuak arautzeko udal ordenantzan jasota daude. 2012-03-30eko Gipuzkoako Aldizkari Ofizialean argitaratu zen, eta baldintza guztiak bertan agertzen dira.
Herri mailan, tarteka, herritarrei galdetzeko ohitura duela adierazi du udalak etxebizitzetan interesaturik ba ote den jakiteko. Udazkenean lau interesatu egon litezkeela ikusi zuten, eta martxan jarri dute proiektua. Lehentasuna izango dute herritarrek eta zozketa bidez banatuko dira. Baina, altzotarrekin guztiak osatuko ez balira, lehentasunen hurrenkera hau jarraituko lukete zozketarako: Altzon erroldatuak azken bi urteetan, Altzon erroldatuak, Tolosaldean erroldatuak eta bestelako pertsona fisikoak.
Lehen izen emate honetan etxebizitza guztiak ez balira beteko, etxebizitza eskatzeko epea beti irekita egongo litzateke udaletxean. Obrak 2021eko udarako bukatzea espero dute.