Lehen helburu horri buruz, "inguruan gertatzen diren egoera zapaltzaile eta baztertzaileak ikustaraztea, eta horien inguruko hausnarketa egitea" gaineratu dute antolatzaileek. Saretze feministaren garrantziaz ohartzeari buruz, berriz, "inor bakarrik ez dagoela jakinaraztea, elkarrekin gaudela eta elkarrekin aurrera egin behar dugula. Finean, bertan bildu ginen guztiok ahaldunduta ateratzea".
Hamar minutu inguruko ekitaldi bat egin zuten. Narratzaile batek testu bat irakurtzen zuen bitartean talde feministako kideak testuan aipatzen zena antzezten ibili ziren momentu berean, isiltasunean. "Oso ekitaldi bisuala" izan zen.
Testuak hainbat zati zituen. "Hasteko, emakume gazteok parrandan eta etxera bueltan jasan beharreko erasoez hitz egin genuen. Jarraian duela lau urte Euskal Herrira bizitzera etorri zen emakume zaintzaile eta garbitzaile baten inguruan, eta, azkenik, jasotzen dituen komentarioen harira eskolan hitz egiteari utzi dion ume baten inguruan jardun ginen. Lau pertsonai horiek antzeztuak izan ziren", zehaztu dute antolatzaileek.
Ondoren, antzeztu gabe beste eraso batzuen inguruan hitz egin zen: "Jihaba jantzita duen emakumeari egindako begiradak, ama ez izatea erabaki duenak edo eraso bati ausardiaz erantzutea erabaki duen emakumearen inguruan ematen diren zurrumurruak...". Bitarte horretan beste taldekide batzuk ahoa zeloz tapatuta zutela ikusleen tartetik ateratzen joan ziren.
Amaieran, testuak erabateko bira eman zuen. "Guzti horrekin amaitzeko momentua iritsi dela aipatzen da, indarrak batu, ahaldundu eta aurre egiteko unea dela", gaineratu dute. Orduan antzezleek ahotik zeloa kendu, erratza lurrera bota zuten eta elkarri eutsita talde bat osatu. "Ikusleei ahalduntzeko zuzeneko mezuak eman zitzaizkien, elkarri zaindu, babestu eta borrokatzeko animatuz. Denon arten posible dela aipatuz", esan dute taldekoek.
Ondoren, (In)justizia patriarkalaren aurrean, saretze feminista lelopean kontzentrazioa egin zen.
"Jende asko gerturatu zen ekitaldira eta herritarrak oso hunkituta egon ziren, batzuk baita malkotan ere", esan dute antolatzaileek. "Haien hitzetan, lehen pertsonan larritasuna eta beldurra sentiaraztea lortu genuen; eta bukaeran aldiz, denon indarra ere nabaritu zen. Herrian indarra badagoela nabaritu eta elkarrekin ahalduntzeko bikaina izan zela esan ziguten; baita zoriondu ere".