Altzoko Erraldoiak hazten jarraitzen du. Aitor Arregik eta Jon Garañok zuzendutako Handia filmak Feroz sarietarako lau izendapen jaso zituen abenduan. Dramako film onenaren atalean, eta musika, trailer eta kartel onenaren ataletan lehiatu da, hain zuzen.
Bada, bart gauean izan da sari banaketa ekitaldia, eta musika onenaren eta kartel onenaren sariak eskualdean grabatutako filmarentzat izan dira. Pascal Gaigne konpositorearen soinu bandak jaso du ekitaldiko lehen saria. Kartel onenaren saria, berriz, Iñaki Villuendasen lanak jaso du.
Irailean Donostiako 65. Zinemaldian estreinatu zutenetik lorpenak pilatzen ari da Arregi eta Garañoren filma. Historiako euskarazko film arrakastatsuena izan da zinema aretoetan. Orain, bi sari irabazi ditu, eta otsailaren 3an ospatuko diren Goya sarietarako ere 13 hautagaitza pilatu ditu, izendatu guztien artean hautagaitzan gehien dituen filma izanik.
Honako izendapen hauek lortu dituzte Goya sarietarako: pelikula onena (Irusoin, Moriarti, Kowalski Films eta Aundiya Film AIE), zuzendari onena (Arregi eta Garaño), jatorrizko gidoi onena (Arregi, Andoni de Carlos, Garaño eta Jose Mari Goenaga), jatorrizko musika onena (Pascal Gaigne), aktore berri onena (Eneko Sagardoi), produkzio zuzendaritza onena (Ander Sistiaga), argazki zuzendaritza onena (Javier Agirre Erauso), muntaketa onena (Laurent Dufreche eta Raul Lopez), zuzendaritza artistiko onena (Mikel Serrano), jantzi diseinu onena (Saioa Lara), makilaje eta ile apaintze onena (Ainhoa Eskisabel, Olga Cruz eta Gorka Agirre), soinu onena (Iñaki Diez eta Xanti Salvador) eta efektu berezirik onenak (Jon Serrano eta David Heras).