Goizean erakutsi bada ere filma lehendabizikoz ikuslegoari, gaueko saioa izan da bereziena, bertan izan baitira pelikularen egileak eta aktore protagonistak. Alfonbra gorria zapaldu dute Altzoko Handiari buruz pelikula osatu dutenek, jendearen berotasuna jasoz. Emanaldiaren ondoren, Aitor Arregi zuzendariak azaldu duenez, "urduri geunden, baina aldi berean bagenekien etxean jokatzen genuela. Guk konfiantza handia dugu pelikulan, gustatzen zaigu; ziur gaude bere publikoa duela, eta oso pozik eta oso kontentu gaude erreakzioarekin. Jendearen afektu handia sentitu dugu, eta horrekin pozik gaude".
Joseba Usabiaga aktore tolosarrak gaineratu duenez, "Altzoko istorio bat izanik, nire herri ondokoa, jende ezagun asko ikusi dut eskailera jaisterakoan eta nik emozio handiarekin bizi izan dut". Eneko Sagardoy aktoreak, Altzoko Handiaren rola egiten duenak, emanaldi "zaila" izan dela dio: "Jendearekin ikustean, denbora guztian zaude ea nola erreakzionatuko duen. Polita izan da, eta honek ematen dio zentzua egindako lan guztiari".
Altzoko hainbat herritar izan dira ere gaueko saioan. Tartean, Joseba Elduaien alkatea izan da bertan, eta gustura ikusi du filma: "Ni irekia nentorren, aurreiritziak kenduta eta begiak irekita. Iruditu zait zer pentsatu handia ematen duela, hausnartzeko ematen duela. Bigarren aldiz ikusi eta berriro xehetasuna jasotzeko modukoa da".
Handia filma hasi aurretik, Alfonbra gorritik ere pasa dira Operacion Concha filmeko egile eta protagonistak, eta horien artean, Barbara Goeneaga aktore alkizarra.
