Migel Joakin Elizegi Altzoko Handia-ren bizitzan oinarritutako haurrentzako txotxongilo-operaren lehen emanaldiak eskainiko dituzte igande honetan Donostiako Victoria Eugenia antzokian. Bi saio izango dira: 12:00etan eta 18:00etan.
Donostia 2016k eta Tolosako Nazioarteko Txotxongilo Zentroak sortu dute ikuskizuna, Emmanuel Marquezen zuzendaritzapean. David Azurza altzotarra izan da musikaren sortzailea eta Koldo Izagirrek idatzi du liburuxka. Txotxongiloak berriz, Nestor Basterretxearenak dira.
Antzezle lanetan La Enananaranja antzerki konpainia arituko da, eta horiez gain, Orfeoi Txikiko 30 haur inguru arituko dira kantuan. Ikuskizuna "kalitate handikoa" dela nabarmendu dute antolatzaileek, eta nazioartean ere interesa piztu duela argitu dute, Errusiatik, Hegoafrikatik edo Espainiako zenbait hiritatik eskaintzak jaso baitituzte dagoeneko.
Sarrerak dagoeneko salgai daude, 6, 9 eta 12 euroko salneurrietan.