Slow art kontzeptua 1990eko hamarkadaren hasieran eman zuten ezagutzera zenbait artista ekologista frantziarrek, eta slow food mugimenduari jarraituz, artearen merkatu espekulatibo eta kontsumistaren aurkako aldarria zabaldu zuten; birziklapena eta artisautza bezalako balio estetiko-ekologikoak onesten zituzten.
Artearekiko begirada pausatu eta kontzientea bultzatzeko, hainbat museok apiril hasieran Slow Art Day antolatu izan dute, tartean, Ur marak.
Larunbat honetan, hortaz, 12:00etatik aurrera ekimena egingo dute Alkizako museoan. Anjel Navas, SK Efimeroak eta Elena Cajaraville artistek hartuko dute parte, eta ondoren, Eduardo Arreseygor eta Josema Langararen Qualia dokumentala proiektatuko dute.
Sarrera doakoa izango da, baina aforoa mugatua dutenez, joan nahi izanez gero, mezua bidali beharko da urmara.alkiza@gmail.com helbidera, izena eta telefono zenbakia azalduz.
Antolatzaileek jakinarazi dute, ekimenaren ondoren community food bazkaria egingo dutela. E-posta horretan adierazi beharko da bazkaltzen geratzeko asmoa; 20 euro ordaindu beharko dira eta beganoentzako menua izango da.