Alkizako Udalak herriko barnetegiak egin duen ibilbidea jasoz, liburu bat eta ikus-entzunezko bat prestatuko ditu. Horretarako herritarren laguntza behar du, ordea, eta herritarrei barnetegiarekin lotutako argazkiak eta bideoak eskatu dizkie. Era beran, garai hartako oroitzapenak partekatzeko prest direnei elkarrizketak egiteko prest daude. Horretarako udaletxeko kideekin jarri beharko da harremanetan.
Aurten, 50 urte betetzen dira Alkizako hainbat baserritara lehenengo euskara ikasleak etorri zirela. Jende askok ikasi edo hobetu du euskara Alkizan, eta udalak uste du une aproposa dela hau atzera begiratu eta euskararen normalizazioan zedarri izan zen egitasmoaren historia egiteko. Memoria ez galtzeko ahalegina egingo dute Alkizan, protagonista izan ziren asko bizirik daudelako oraindik, eta horrek bidea ematen duelako informazioa zuzen-zuzenean jasotzeko, «historia zuzen eta artez emateko».