Labo Geo egitasmoa ospatzen ari dira Larraulen eta Alkizan. Gipuzkoako Foru Aldundiaren eta Larraul eta Alkizako Udalen lankidetzari esker, egitarau zabala osatu dute egunotarako. Ostiralean eman zioten hasiera horri, eta gaur izan da azken emanaldiak ikusteko aukera; hain zuzen, Irene Naranjoren 'Jaranda', Amaia Elizaranen 'Iraun' eta Noderen 'Basandere' dantza emanaldiak izan dira Alkizako plazan.
Labo Georen helburua dantza eta praktika garaikideak Gipuzkoako udalerri txikietara eramatea dela azaldu dute antolatzaileek. "Kaleko proposamen eszenikoek eta bitartekaritza-jarduerek kultura, ondarea eta parte-hartzea uztartzen dituzten jardunaldiak osatzen dituzte. Beraz, hirietako praktika artistiko garaikideak deszentralizatzea da, eta espazio eta publiko berriak sortzea, ingurunearekin eta komunitatearekin bat eginez".
