Alkizako Udalak 829.824 euroko aurrekontua izango du 2025ean. Aurten baino 204.000 euro gehiago dira eta, beraz, %9 handituko da aurrekontua. Igoera Gipuzkoako Foru Aldundiaren erabakiak eragin du, datorren urtetik aurrera 1.100 biztanletik beherako udalentzako foru funtsaren ekarpena %40 inguru handitzea erabaki baitu. Honenbestez, gehikuntza hori herritarrei ematen zaien zerbitzua hobetzeko erabiliko dutela jakinarazi dute Alkizako udal ordezkariek. Udal langileen taldea indartu nahi dute bereziki.
Gaur egungo langileen lan jardunak luzatuko ditzute eta lanpostu berriak sortu. Herri langilearen laguntzailearen eta udal arkitekto teknikoaren lanpostuak sortzea aurreikusi du udalak, eta, ondorioz, 92.000 euro gehiago inbertituko ditu haien sarietan.
Heriko hainbat ekintza eta jarduerek ere izango dute aurrekontu igoera: Nerabeen aisia-beharrei begira Gure Plaza Txo! programa garatzeko laguntza %54 igoko da; herriko festetako aurrekontua %28 handituko da; genero-berdintasuna lantzeko Berdinbidean programaren aurrekontua bikoiztu; eta kultur-jarduerak egiteko eta sustatzeko aurrekontuak zortzi bider egingo du gora.
Aurtengo aurrekontuarekin alderatuta, inbertsioek %25eko jaitsiera izango dute. «Arrazoi nagusia da udalak Erretore etxeko inbertsioekin jarraitzeko diru kopuru txikiagoa gorde duela beste inbertsio batzuen mesedetan», azaldu dute udal ordezkariek. Datorren urtekoen artean honakoak aipatu dituzte: lursailak erostea; udal bulegoetan hobekuntzak egitea; herri-bideak konpontzea; eta Hernio-Gazume KBEan hainbat interbentzio egitea.
Aurrekontuaren inguruko xehetasunak azaltzeko herri batzarra egingo dute Alkizan datorren urtarrilaren 17an.