Alkizako Udalak ikerketa arkeologiko bat abiatu nahi du abuztuan Olatzazpiko koba miatzeko. Ikerketa hau aurrera eramaten Aranzadi zientzia elkarteko Jesus Tapia arituko da. Udalari "oso garrantzitsua" iruditzen zaio herritarrek proiektuaren parte izatea, egitasmoaren helburuetako bat Alkizako ondareari balioa ematea baita.
Abuztuaren lehen hamabostaldian gauzatuko litzateke ikerketa eta izen emateko uztailaren 25era arteko epea eman dute. Horretarako 676 49 01 43 telefono zenbakira hots egin beharko da edo mezua idatzi jtapia@aranzadi.eus helbidera. Behar diren boluntario kopurua mugatua denez, bidalitako mezuari erantzunez, Jesus Tapiak berak ziurtatu die parte hartzaileei laguntzeko aukera izango duten ala ez.