Tolosa Aurrera Pilota Elkartean hezia, Gorka Ugartemendiak bi urtez sinatu du Baiko Pilotarekin eta apirilean egingo du debuta. Ugartemendia eskertuta azaldu da Baikok debuta egiteko emandako aukeragatik: «Emandako konfiantzari espero dut erantzun ona ematea».
Aimar Olaizola Baikoko kirol arduradunaren hitzetan «pilotari oso langilea da, eta azken hilabeteetan gora egin du». Olaizolak gaineratu duenez, «ezker ona badu ere, eskuina berezia du».
Afizionatuetan, Ugartemendiak promesa mailan eta elite mailan irabazi du Diario Vasco Torneoa. Antiguako Pilota Txapelketa ere irabazi du, eta Euskal Ligako txapela jantzi du.