Apirileko lehenengo larunbatean nazioarte mailan ospatzen da Slow Art eguna. Alkizako Ur Mara museoak ere bat egin du ekimenarekin eta bost obra hautatu ditu, lasai begiratu eta sortzaileekin iritziak partekatzeko. "Irudi bat bestearen atzetik ikusi ordez, astiro behatzeak gure pentsamendua abiarazten du ikusten ari garenari buruz sakontzeko", esan du Ur Marako arduradun Koldobika Jauregik.
Bost artista hauek hartu dute parte ekimenean: Juan Kruz Igerabide eta Koldobika Jauregik aforismoak eskaini dituzte; Juan Chillidaren Konstelazioak izeneko lanaren zati bat ikusi ahal izan da; Maria Giró eta Julia Leigh artistek berriz Hatzen memoria aurkeztu dute, eta zuntz ezberdinekin egindako lanak ekarri dituzte Ur Marako negutegira; Ainhoa Goenagak, berriz, Isilune obra aurkeztu du eta zeramikarekin egindako instalazioa eta beste hainbat lan erakutsi ditu; Aitor Irulegi alkizarrak, aldiz, Euria izenarekin lau pieza erakutsi ditu.