Alkizako Udalak kontzentrazioa antolatu du martxoaren 4an, 18:30ean, Ukrainako herriari elkartasuna adierazteko eta herrialdearen inbasioa gaitzesteko. Ostiralean bilduko dira herriko plazan eta parte hartzeko deia egin diete alkizarrei.
"Urtarrilaren 24an Errusiako armadak Ukrainari eraso zion eta estatu horren lurrak militarki okupatzen hasi zen. Harez gero, gerra dago Ukrainako lurretan", adierazi du Alkizako Udalak. Egoera honen aurretan, erasoa "tinko" gaitzetsi du udalak eta Errusiari eskatu dio eraso militarrari amaiera emateko. "Gatazkak eta desadostasunak ez dira indarraren bidez konpontzen, elkarrizketaren bidetik baizik eta bi parteei eskatzen diegu armak isildu eta elkarrizketa zintzo bati heltzea, nazioarteko eskubidea eta herrien autodeterminaziorako eskubidea zutoin izango dituena".
Ukrainako herritarrei "samina eta elkartasuna" adierazi die udalak eta bereziki gogoan izan ditu ukrainar jatorriko alkizarrak eta beraien familiartekoak. Bide batez, Ukrainatik etor daitezkeen errefuxiatuak hartzeko konpromisoa hartu du, "herriak dituen baliabideen neurrian".